Noshi Gilani

Ghazal - Shaam e Tunhai Mein

شامِ تنہائی میں

اب بھی شاعر رہوں

کِس کی خاطر رہوں

کون ہے جو مرے نفط و معنی کی آنکھوں سے بہتے ہُوئے

آنسوؤں میں چھُپے درد چُنتا پھرے

خواب بُنتا پھرے

کون ہے جو مِرے خُون ہوتے ہُوئے دل کی آواز پر

اپنی آواز کے ہونٹ رکھتا پھرے

کون آنکھیںمِری دیکھ کر یہ کہے

’’کیا ہُوا جانِ  جاں

کب سے سوئی نہیں

اس سے پہلے تو تم اِتنا روئی نہیں

اُب بھلا کِس لیے خُوبصورت سی آنکھیں پریشان ہیں

اپنی حالت پہ خُود اتنی حیران ہیں ‘‘

کون بے چین ہو

کون بے تاب ہو

موسمِ ہجر ک شامِ تنہائی میں

آبلہ پائی میں 

کون ہو ہم سفر ‘ گردہے رہگزر

کوئی رستہ نہیں کوئی راہی نہیں

درپہ دستک کی کوئی گواہی نہیں

دل کے ویران و برباد صفحات پر

جس قدر لفظ لکھے تھے بے کار ہیں

ایک لمبی جُدائی کے آثار ہیں

سوچتی ہوں کہ اَب

ان خیالوں سے خوابوں سے باہر رہوں

کیون میں شاعر رہوں

کِس کی خاطر رہوں